وصيتي

اليوم : الجمعه
الساعة: 11:24
بتاريخ : 12 - 6 - 1430هـ





شهرين قالوا عنها يكثر فيها الموتى
وهالسنه احساسي غير
فيه شيء بيصير يمكن انا
يمكن احد من اخواني او خواتي مدري ..

الموت كاس ولازم الكل يشربه << كلمة امي دائما
وورقته وحتت << بمعنى سقطت كأوراق الخريف
وأمانة ورجعت لصاحبها ...


عبارات ترن بمسامعي وتتفاوت
من شهر شهرين الي 5 شهور واحيانا سنه
لكنها جزء بحياتي ومعي


الموت له هيبه ..
هيبته قويه ومخيفه ترجف كل مشاعري وتتجمد أطرافي
من مجرد اسمع فلان او فلانه ماتت

أخر ناس سمعت بوفاتهم هو الشيخ عبدالعزيز الوهيبي
واثرت فيني مثل ما أثرت بالكثير بنته ميمونه الله يرحمهم جميعًا ...
سبحان الله قبل ماتموت كاتبه وصيتها ..
توصي بتقوى الله وبالوصل والبر
وتوصي امها ماتبكي عليها
وتوصي ابوها يكون مثل ماهي خابرته نبراس
هالوصيه كاتبتها قبل ماتموت ومن بين الفقرات كاتبه انو هالوصيه وانتي تقرأونها تراني تحت التراب فلاتبكين يايمه
مادرت الله يرحمها انها هي وامها وابوها جاتهم المنيه بنفس الوقت ...... آآآآآآآآآه هذا حالك ياميمونه الخير





حالي انا من فتره حسيت اني بموت وصرت اوصي ناس بين فتره وفتره
بس بقى شيء بخاطري ودي اقوله
قلت يابنت وش اسوي وين اقولها
فقررت اكتب هنا
اول ماجاتني الحاله وصيت من جد اخوي ترى هذا لفلانه
ولاتنسون تسووون الي قلت لكم عليه
وترى مانيب مديونة لاحد ولله الحمد
بغيت اقول له تكفى لاتخلي امي تغسلني
لكن وقفت الكلمه بحنجرتي ماقدرت..

لازالت الرغبه عندي مابغاها تغسلني ..
يارب ماتغسلني امي
رغبتي هذي جاءت لاني خايفه ان امي تشوفني بشكل بشع
ايه من جد انا مازكي نفسي
وياكثر الذنوب يارب منك المغفره

ادري ان كلنا ذنوب وانا اكتب ليس تفاخرًا او مجاهرًة انما رغبة بالخلاص
وياليتني القاه !!!

مره وانا جايه من المدرسه كان الجو حااااااااااااااااااااار
وقسم يلسع الجلد
فجأه تذكرت كلمة امي يالله النجاة من حر النار
اناظر نفسي كيف ماقدرت اتحمل هالحرارة الدنيويه
كيف بتحمل حرارة الاخره .....


ميمونه قالت بوصيتها تقوى الله
وانا اقول بوصيتي امي لاتغسلني

فرق شاسع
يارب جعلني اكون من اهل الجنه
يارب اتوب لك باليوم عشرين مره وارجع اليوم الثاني كما كنت
واتوب بالليله نفسها وابكي وارجع بعدها للخنبقه نفسها
متى يارب تقربني .. يارب مغفرتك ورحمتك ويارب تعصم قلبي وتغسله بالايمان


لحظات مني وحروف تساقطت غصبًا عني